افغانستان سلايډ (فيچر)

ننګرهار ته د غني د سفر او داعش د ماتې په اړه د طالبانو غبرګون

طالبانو ننګرهار ته د ولسمشر غني د نن سه شنبې/لړم ۲۸مه نیټې د تازه سفر او هلته له ولایتي چارواکو،امنیتي او استخباراتي مسوولینو، د ملي پولیسو، محلي پولیسو او پاڅونوالو له مشرانو سره د لیدنو کتنو او په دغه ولایت کې د داعش ډلې د بشپړې ماتې او د تسلیم شویو داعشیانو په اړه د نوموړي څرګندونو ته توند غبرګون ښوولی.

د وسله والو طالبانو ویاند ذبیح الله مجاهد پر خپله ټویټر پاڼه ویلي، چې په ننګرهار کې د داعش ځپنې عملیات د دوی ابتکار او تر ټولو قوي عملیاتو وو او دا چې څوک وايي په دې کې د اشرف غني او حکومت رول څومره و، نو د داعش د ځپلو په عملیاتو کې د حکومت او امنیتي ځواکونو رول بیخې نه و،  کیدای شي په ژغورنه کې يې رول لوبولی وي.

ښاغلی مجاهد زیاتوي: « دکابل ادارې او بهرنیو حامیانو يې په ننګرهار کې د داعش په ملاتړ داسلامي مجاهدینو ته مشکلات جوړول، چې د عملیاتو د اوږدیدو سبب وو.
په پای کې د داعش هغو غړي ته چې د اسلامي امارت مجاهدینو په وروستیو ځالو کې محاصره کړي وو، د کابل ادارې لخوا نجات ورکړل شو، چې له داعش سره ښکاره خواخوږي ده.»

په دې اړه د طالبانو غبرګون د ذبیح الله مجاهد پر ټویټر :

ولسمشر غني نن په ننګرهار کې د خپل سفر پر مهال امنیتي او استخباراتي ځواکونه له دې کبله وستایل،چې داعش ته یې ماتې ورکړه. نوموړي د تسلیم شویو داعشي جګړه مارو د سرنوشت په اړه وویل، چې د هغوی اکثریت چې پاکستانیان او د پولې پورې غاړې اوسېدونکي دي، حکومت نه بلکې که غوښتنه یې وشي، نو ولسونو ته به یې سپاري.

 

نړۍ نيوز

نړۍ نيوز

نړۍنيوز خپلواکه او بې پرې خبري، تحلیلي او معلوماتي وېب پاڼه ده، چې د بیان د ازادۍ اصل ته په پام د ورځنیو کورنیو، سیمه ییزو او نړیوالو پېښو اړوند خبرونه، تحلیلونه او د لیکوالو نظرونه وړاندې کوي.

څرگندون

خپور کړه

ستاسو برېښناليک به نه خپريږي. غوښتى ځایونه په نښه شوي *

وروستي

زېرمتون